Act 4 | MCQ | STEP | Pita'o Joni'o va'a hine ea mapoka kajihi pu'úmo vu'a 'wavi'i hi'eme pirisiti 'ee hirisima ka'ene Temiporu 'ajohi'inijine 'ee Sajusi ijija puni roajivara.

Acts 4

Pita Kaivo Joni'o Kanisorupuni Una'i Aherama Va'ajina

1 Pita'o Joni'o va'a hine ea mapoka kajihi pu'úmo vu'a 'wavi'i hi'eme pirisiti 'ee hirisima ka'ene Temiporu 'ajohi'inijine 'ee Sajusi ijija puni roajivara. 2 'Enareja pu niho'o ni'ima'ura senavara. Ijihuni maijaho Pita'o Joni 'o ea najahareja Jesuni vaji ea ka'ene kwamasa'avajija kú'o 'urihuna 'iavumakame senavara. 3 'Ejumakame vea na'í venajihuna'e pu 'unirame 'eka va'e tipurai irechamiume hi'eme sú'o nitumana. 4 'Enakaivo ea ka'ene puni vu'a kaji hene nimaa rojajaho parua mapoka (5,000) nimaa rojara. 5 Ijihuni sú'uhijino puni emaina 'ee Sikuraipi 'ee puni mama'inijija Jerusaremi roe rira kwino ahuvara. 6 Anasi ka'ene pirisiti natohwijaho 'ee Kaiapasiho Joni ho 'ee Arekisanita ho 'ee pirisiti natohwijihuni ituha pu'úmo ahuma hijara. 7 Pu no'o aherame roe puni una'i irechami'i kaivo pu aporama ijá 'iava Rakijihuni haruri vejare? Irahuni ihi 'urahume ijaho aranane? 'iavara. 8 'Ejume Pitaho Godoni 'Avenijara ruha apena parajumakame emaina 'ee puni mama'ina ijá 'iama 9 Ja nú iviasi 'otui irechamú'irono avaju. Ijihuni maijaho nú ea ka'ene mumora siseraji'ina vejume ichá'ina maranaji he'irono avaju? 10 Ja ea mapoka 'ee Isureri orakije ike he'avara! Ijaho Jesu Keriso Nasareti ora ka'ene jara icha 'ahi 'anaume kwamana'omo Godira vejume kú'o 'urina jihuni ihijara vejume ea ka'ene joni una'i naminukaho maranana.

11 Hu muna ka'ene ja ea ka'ene ara veji'inijipo ura parenajina kaivo ijaho muna ahisima'ura ka'ene ara 'unanahuniji rena naminu 'wamana.
12 Godoni ari vahuni 'unamijaho Iha nikwinu reje nú vahuna. Ei pini mwe'aki nú ni'ajúhakame Godoni vahuna pana kaivo Godira Jesuho ea mapoka ikehipuni ni'ajihi'ina mihana'omo ijara ni'ajihakame Godoni vahuna 'iamana. 13 Emaa kajipo kivume Pita'o Joni'o puni una'i namine paju'i kaivo ajira 'waravara. 'Ejumakame pu ea kajija sikurua pakavi'ina 'ee ea mamaha'omo ea najahaji kimareja niho'o oja hwa'usahura. 'Ejume emaa kajipo hejajaho pu Jesu pu'úmo 'urahojura hejara. 14 'Ejumakame ea ka'ene pu vejuma maranajaho ijí pu pu'úmo namijumakame emaa kajipo 'warahuna areri parenana. 15 'Ejume ema kajipo pu no'o irechamiume ma'ahi va'eme pu hine 'wama apene pira'aravara. 16 'Enareja pu ijá 'wava Eakija nú ichá'ina ve'eja? Pu no'o unenu'u pina vejume ea mapoka ka'ene Jerusaremi hijujija nikivara. 'Ena'omo núra ijí hekajihuna areria parenu. 17 'Enakaivo ike vu'akara parausahe emaapuni vaja vahuna re'amajaho roe ira kisima'ura'e 'waravakame pu ijí Huni iha kajaho kú'o pa'urahi'i ea 'aho'a 'warahuna. 18 Pu 'umenaume va'umakivi'i ijá 'iva Ja kú'o Jesuni iha kajaho pa'urahi'i ea 'warahune 'ee naja'avara 'iavara. 19 'Ejume Pita'o Joni'o eha vene pu ijá 'iava Ja vwihajujaho 'unama ariramaa raki jarane? Joni ira hena vehunijina ho Godoni ira hena vehunijine? 20 Nú raka ka'ene kame hejajaho areri pa'arehuna kaivo nú 'warahuna 'iavara. 21 'Ejume emaa kajipo pu no'o juvu vu'a ira ajira 'waramareja irechamiume va'ara. Ea ka'ene mapokijaho pura raka ka'ene vejaji kame Godi ta'aroha jihuna'e pura pua'e sise'i 'ahihuni 'unama pa'arenana. 22 Ea ka'ene ijí pu vejume marana kajaho juara mapoka mapoka (40) pa'arenana.

Nimaa Roji'inijipo Pajuhuni Siporua Ka'ene 'Ojajina

23 Pu irechamiajaho napuhwa puni va'ara. 'Enareja pirisitia mama'ina 'ee emainijipo raka ka'ene pua 'waravajaho 'waravara. 24 'Ejume pu ijí henareja ahuma hine siporua 'one Godi ijá 'wava Natohwa ka'ene akúpa vene mwe'a vene soha vene uneunecha ka'ene ijihuni vaji hijujija venaji'o 25 nitama Oni 'Aveni vu'a pina apene núni oma Oni pwea ka'ene Teviti oni ira vaji rene roa ijá 'úma

Irakijihuna'e Jenitarua hina sena vejo? 'Ene emaa 'unama aniani maa pa'ajija vejo? 26 Kinia 'ee ea 'ajohai'ina ahuma namiji'i Natohwijaho 'ee Huni Kerisoho ninavara 'úmana.
27 Nimae ike arakino Heroti ho Ponachasi Pairati ho 'ee Jenitarua 'ee Isureri ora ahume Oni pwea ariramaa Jesu ka'ene Ara iji pijahaji ninavu. 28 Pura iraka ka'ene vejajaho Ara nitama vwihane amairiarama ja'ina'e vejara. 29 Oo Natohwe iviamaa pura juha vu'a kisina ka'ene 'wavujaho vwihana. 'Enareje nú Oni pwehijakaho ni'ajúha. 'Ejakame nú harura'e Oni ira 'wara'avajaho paju'ika'i nú ea najaha. 30 Oni ija jorane ea veje maranie 'ee aacha ani ani'ina oni pwea ariramaa ka'ene Jesuni iha 'ahi vena 'wavara. 31 Pu siporua 'ojume pa'are'eme ijí sea ka'ene pura hija kajaho vari'eme Godoni 'Aveni puni vaji ruha apenana. 'Ejume iji'a Godoni vu'a paju'i kaivo aneja vene najahara.

Nimaa Roji'inijipo Kukua Puna Swara Vejajina

32 Ea mapoka ka'ene nimaa roji'ina kajija puni oja 'ee vwiha nikwinu vwihajara kaivo ea pina unenu'u pina nuna pa'iamana kaivo pu uneunecha mapoka 'eke totari 'ojura. 33 Pu apasorua kajija haruriji'i Jesu ka'ene Natohwijara kwama 'urinaji 'waravume Godi pu ni'ima'ura'e maiji vwihaniana. 34 Puni vaja kajaho ea pina unenu'u pina panupivi'i hinana. Ijihuni maijaho ea kajija maho'o mwe'a 'ee sea rukina'omo 'imenareja ijí monia kajija 'eke roara. 35 'Ejumakame pu monia kajija 'eka roe apasoru epuni una'i irechavume pu 'eke ea ka'ene uneunecha pa'ajihi pura pivusahuji kivi'i 'oi'oi vajihara. 36 Ea pina huni iha Josapina kaivo Jesuni pwehipo iha pina 'iame Panapasina 'wavura. Ijí Panapasi 'wavu kajihuni maijaho Ni'ajihi'ina 'wavura. Hu Rivai oni amuja 'ee kwaa iha Saiparasi nahejara. 37 'Ena'omo hu huni mwe'a pwina ea 'aho'a 'imenae monia 'ekana. 'Enarena hu monia kajaho 'eka roe Jesuni apasoru puni una'i irechamana.